Sentyabrın 26-da Azərbaycan Respublikası Dövlət Neft Şirkətinin “Günəşli” yatağındakı 19-cu stasionar dərin dəniz özülündə 71 saylı quyuda təmir işləri aparılarkən baş verən qaz təzahürü barədə məlumat “Azərbaycan Xəzər Dəniz Gəmiçiliyi” Qapalı Səhmdar Cəmiyyətinə daxil olan kimi dərhal Gəmiçilik tərəfindən təxirəsalınmaz tədbirlər görülmüşdür. SOCAR və Fövqəladə Hallar Nazirliyi ilə daimi əlaqə saxlayaraq, tələb olunan bütün gəmilər hadisə yerinə mobilizasiya olunmuş və dənizdə aparılan əməliyyatların koordinasiyası təmin edilmişir. Hadisə yerində Gəmiçiliyin “Nefteqaz-64” və Nefteqaz-10” gəmilərində qərargah yaradılmış və hadisə yerinə cəlb olunan gəmilərin işi koordinasiya olunmuş, əməliyyata cəlb olunan gəmilərin fəaliyyəti vahid mərkəzdən idarə edilmişdir.
Qəzanın aradan qaldırılmasında və saat 18-dən sonra başlamış yanğının söndürülməsinə Azərbaycan Xəzər Dəniz Gəmiçiliyinə (AXDG) məxsus “Nefteqaz-10” və “Nefteqaz-64”, AXDG-yə məxsus, FHN tərəfindən idarə olunan “Vixr-5” və “Vixr-7” gəmiləri ilə bərabər, BP Azərbaycan şirkətinin rəhbərliyinin razılığı və köməkliyi ilə həmin şirkətə xidmət göstərən gəmilər də cəlb edilmişdir. Belə ki, Xəzərdə ən böyük yedək-təchizat gəmisi olan Gəmiçiliyin “Lənkəran” gəmisi, AXDG – BUE Caspian Alyansının həmin şirkətə xidmət göstərən “Topaz Dignity”, “Caspian Protektor”, “Caspian Voyager” gəmiləri və onların heyətləri qəzanın aradan qaldırılmasında xüsusi rol oynamışdır.
Səhər saatlarında alov söndürüldükdən sonra özüldə təmir-bərpa işləri başlamışdır. Hazırda Gəmiçiliyin G.Şıxlinski və Şirvan-2 kran gəmiləri, Nefteqaz-64, Aura, Om təchizat-yedək gəmiləri, AXDG-yə məxsus, FHN tərəfindən idarə olunan “Vixr-5” və AXDG – BUE Caspian Alyansının “Caspian Server” gəmiləri qəzanın nəticələrinin aradan qaldırılması ilə əlaqədar aparılan işlərə cəlb olunub
