Bu ilin yanvar-avqust aylarında Azərbaycana 11,979 mln. ABŞ dolları dəyərində 5 095,49 ton dəniz məhsulları idxal edilib.
“APA-Economics”in Dövlət Statistika Komitəsinin məlumatları əsasında apardığı hesablamalarına görə, cari ilin ilk səkkiz ayında ölkəyə 68 kateqoriya üzrə idxal olunan dəniz məhsullarından ən çox dondurulmuş şimal və cənub putassusu olub – 2,382 mln. dollar dəyərində 999,77 ton. Bu növ balıqlar əsasən Yeni Zelandiyadan idxal olunub. Ümumiyyətlə, hesabat dövründə təkcə bu ölkədən Azərbaycana 1 721,43 mln. dollar dəyərində 688,57 ton dondurulmuş putassu gətirilib.
Dəniz məhsullarının idxalına görə ikinci yeri şirin suda yaşayan dondurulmuş balıq və nərələr tutub – 705,89 ton. Bu balıq növləri ölkəyə Rusiyadan gətirilib.
İdxal edilən dəniz məhsullarının üçüncü yerində əsasən İslandiyadan idxal olunan dondurulmuş skumbriya qərarlaşıb – 593,16 ton.
Qeyd edək ki, yanvar-avqustda Azərbaycana idxal olunmuş dəniz məhsulları əsasən Yeni Zelandiya, Rusiya, İslandiya, Çili, Kanada, Hindistan və Vyetnamdan gətirilib.
Yanvar-avqustda Azərbaycana idxal edilən TOP-10 dəniz məhsulu:
| # | Dəniz məhsulu | Həcm, ton | Dəyər, min ABŞ dolları | Əsas ixracatçı ölkə |
| 1 | Dondurulmuş şimal və cənub putassusu | 999,77 | 2 382,42 | Yeni Zelandiya |
| 2 | Şirin suda yaşayan balıq, nərələr | 705,89 | 882,84 | Rusiya |
| 3 | Dondurulmuş skumbriya | 593,16 | 879,2 | İslandiya |
| 4 | Dondurulmuş naqqa | 563,49 | 723,46 | Vyetnam |
| 5 | Dondurulmuş karp | 459,95 | 769,56 | Rusiya |
| 6 | Merluccius cinsli digər balıq merluza | 422,51 | 957,97 | Kanada |
| 7 | Dondurulmuş Atlantik və Dunay qızılbalığı | 399,78 | 1 957,28 | Çili |
| 8 | Təzə və ya soyudulmuş karp | 312,06 | 398,23 | Rusiya |
| 9 | Hisə verilmiş krevetlər | 92,01 | 701,96 | Hindistan |
| 10 | Dondurulmuş Sakit okean qızılbalığı | 65,88 | 297,85 | Rusiya |
Mirsəid İbrahimzadə
