Bu gün Mübariz Mənsimovun məhkəməsidir

151

Bu gün Bakı vaxtı ilə saat 11-də Türkiyə Cümhuriyyətinin 27-ci İstanbul Ağır Cəza məhkəməsi “Palmali” şirkətinin qurucusu, Azərbaycanlı iş adamı, xeyriyyəçi Mübariz Mənsimovun barəsində irəli sürülən ittihamnaməyə baxacaq.

AKTUAL TV xəbər verir ki, məhkəmə iclası ictimaiyyət və mətbuat üçün açıq olacaq. Lakin COVİD-19 pandemiyası səbəbindən iştirakçıların sayı məhdud olacaq. Mübariz Mənsimovun məhkəmə binasına gətiriləcəyi hələlik bəlli deyil. Pandemiya səbəbindən onun iclasa onlayn rejimdə qoşulması da mümkün ola bilər.

Xatırladaq ki, Mübariz Mənsimov Türkiyənin hüquq-mühafizə orqanları tərəfindən bu ilin mart ayının 15-də saxlanılıb, martın 17-də isə onun barəsində həbs qətimkan tədbiri seçilib. Azərbaycanlı iş adamı FETÖ terror təşkilatı ilə əməkdaşlıqda ittiham olunur.

Mübariz Mənsimov ilk gündən bu ittihamların hamısını rədd edir və bu işin ona qarşı əvvəlcədən planlaşdırılmış qurğu olduğunu bəyan edir. O, həbsdə olduğu müddətdə də dəfələrlə bildirib ki, onun FETÖ terror təşkilatı ilə heç vaxt əlaqəsi olmayıb.

Mübariz Mənsimov onu da vurğulayıb ki, özü və rəhbərlik etdiyi “Palmali” şirkəti hər zaman Azərbaycanın və Türkiyənin dövlətçiliyini dəstəkləyib və dəstəkləyəcək. “Palmali” şirkətinin qurucusu həmişə bəyan edib ki, hüquqi dövlətdə yaşayır və Türkiyədə hər şeyin qanun çərçivəsində həll olunduğunu dərk edir. Bu səbəbdən Mübariz Mənsimov bir daha bildirib ki, Türk ədalətinin düzgün qərar verəcəyinə əmindir.