Vyetnamdan Koreyanın Pxyontxek limanına keçidi zamanı konteynerdaşıyan gəminin göyərtəsində faciə baş verib.
“Seanews.az”, “seafarersjournal.com”-a istinadən xəbər verir ki, 24 yaşlı vyetnamlı dənizçi kayutunda bir neçə stəkan viski qəbul etdikdən sonra kapitan körpüsünə daxil olub və kapitanı bir neçə dəfə vurub. 44 yaşlı Çin vətəndaşı hadisə yerindəcə dünyasını dəyişib.
Gəmidə 17 vyetnamlı və 2 çinli olmaqla ümumilikdə 19 heyət üzvü çalışıb.
Ertəsi gün səhər konteyner gəmisi Pxyontxek limanına çatıb və təqsirli bilinən dənizçi həbs olunub.
Dənizçi ilkin ifadəsində heyətin başçısını guya “onun həyatını dözülməz hala gətirdiyi üçün” vurduğunu bildirib.
Faciə Panama bayrağı altında üzən “PADIAN 3” konteyner gəmisinin göyərtəsində baş verib.
Hadisə ilə bağlı araşdırma aparılır.
