Estoniya Müdafiə Nazirliyi Baltik dənizində dəniz nəqliyyatına nəzarətin mümkün olduğu ərazini ikiqat artıracaq qanun layihəsi hazırlayır.
“Seanews.az” xəbər verir ki, bu barədə “ERR” teleradio yayım portalı məlumat yayıb.
Qanun layihəsi qəbul olunarsa, müəyyən hallarda Estoniyanın ərazi sularından kənarda da gəmilərin dayandırılmasına imkan verəcək. Söhbət bitişik zonanın – sahilyanı dövlətin qanunla müəyyən edilmiş ərazilərdə nəzarəti həyata keçirə biləcəyi ərazi dənizinə bitişik dəniz məkanının bir hissəsinin tətbiqinin mümkünlüyündən gedir.
Müdafiə Nazirliyinin sözlərinə görə, “bu, sualtı kabellərin və boru kəmərlərinin tam qorunmasına zəmanət verməsə də, Estoniyanın dəniz məkanına nəzarətini gücləndirəcək.”
Estoniyanın dəniz sərhədi sahil xəttindən 12 dəniz mili, yəni təxminən 22 kilometr məsafədə yerləşir. Finlandiya körfəzində körfəzin mərkəzindən keçən xəttdən 5,5 kilometr məsafədə keçir və bu zonadan kənarda dövlətin nəzarəti çox azdır.
BMT-nin Dəniz Hüququ Konvensiyası dövlətin hüquqlarının bir qədər geniş olduğu ərazi dənizinə bitişik zonanın yaradılması imkanını nəzərdə tutur.
Konvensiyaya əsasən, bitişik zona ərazi sularının ölçüldüyü sahil zolağından 24 dəniz mili qədər və ya təxminən 44 kilometrə qədər uzana bilər.
İndiyədək Estoniya bu fürsətdən istifadə etməyib.
“Biz görürük ki, Baltik dənizi hibrid müharibə meydanına çevrilib. Hibrid müharibə əsasən “boz sahələr” hesabına, xüsusən də hüquqi sahədə inkişaf edir. Baltik dənizi regionunun sahilyanı dövlətləri belə boz zonaları nə qədər çox bağlaya bilsələr, hibrid müharibə imkanları bir o qədər az olacaq”, – dəniz hüququ üzrə ekspert və Tartu Universitetinin Hüquq fakültəsinin müəllimi Alexander Lott bildirib.
O qeyd edib ki, Baltik dənizi regionu ölkələri arasında yalnız Estoniya və Latviya bitişik zona tətbiq etməyib.
