Azərbaycan Yelkən Federasiyasının təşkil etdiyi “SFA Federasiya Kuboku 2024” yarışlarının ikinci günü uğurla başa çatdı. Bu mühüm idman tədbiri Azərbaycanda yelkən idmanına olan marağın və dəstəyin artdığını bir daha sübut etdi.
Yarışları izləmək və idmançılara dəstək olmaq üçün Azərbaycan Respublikasının gənclər və idman naziri Fərid Qayıbov, nazirin müavini Mariana Vasileva və Azərbaycan Yelkən Federasiyasının prezidenti Qüdrət Qurbanov şəxsən iştirak ediblər. Onların iştirakı yarışlara verilən yüksək önəmi vurğuladı və bu idman növünün inkişafına olan dövlət dəstəyini bir daha nümayiş etdirdi.
Yarışların ikinci günü olduqca gərgin və maraqlı mübarizələrlə yadda qaldı. Optimist Ümumi və Qızlar sinifində Nərgiz Məmmədova birinci yeri tutaraq yüksək bacarığını nümayiş etdirdi. Optimist Junior sinfi üzrə Nurlan Ağazadə birinci yerə çıxaraq bu günlük öz sinifində ən yaxşı idmançı olduğunu sübut etdi. ILCA 4 sinfi üzrə isə Fidan Ağazadə birinci yeri tutaraq güclü rəqibləri arasında fərqləndi.
Bu nailiyyətlər Azərbaycan yelkən idmanının yüksəlişdə olduğunu və ölkəmizin gənc idmançılarının dünya səviyyəsində rəqabətə hazır olduqlarını bir daha sübut edir.
Azərbaycan Yelkən Federasiyası yarışlarda iştirak edən bütün idmançılara uğurlar arzulayır və gələcəkdə daha böyük zirvələrə çatacaqlarına inanır.
sailing.az
