Bakıda “Azərbaycan Xəzər Dəniz Gəmiçiliyi” QSC-nin (ASCO) “Bibi-Heybət” gəmi təmiri zavodunun yaxınlığında yerləşən gəmi “qəbiristanlığı” adlanan ərazi yerləşir.
Sovet dövründə Xəzər dənizi neft hasilatı sahəsində texniki yeniliklərin sınaq meydançası olub. Onların istifadəsi bu gün də mövcud olan “Xəzər Dəniz Neft Donanması” olmadan mümkün olmayıb. Onun nəzarətində yüzlərlə müxtəlif gəmilər – kran, xilasetmə, yanğınsöndürmə, dalğıc, sərnişin və s. olub
Bu gəmilərin çoxunun istismar müddəti çoxdan başa çatıb və onlar “Bibi-Heybət” gəmi təmiri zavodunun yaxınlığında yerləşən gəmi “qəbiristanlığına” düşüblər.
Zavodun mühafizəçisi Sputnik Azərbaycan-a bildirib ki, əvvəllər daha çox gəmi olub, lakin tamamilə yararsız vəziyyətə düşmüş gəmilərin çoxu artıq parçalanıb.
“Qəbiristanlıq”da SSRİ Qaz Sənayesi Naziri (1972 – 1981), Azərbaycan SSR Elmlər Akademiyasının müxbir üzvü (1967) Sabit Orucovun adını daşıyan məşhur “Sabit Orucov” sərnişin gəmisini də görmək olar. Gəmi 1983-cü ildə Finlandiyada inşa olunub. 2012-ci ildən istifadə edilmir. Orada həmçinin 1988-ci ildə inşa edilmiş “Nefteqaz-58” gəmisi, “Vixr-8” yanğınsöndürən gəmisi və digər gəmilər də var.
Zavod mühafizəçisinin sözlərinə görə, bu “qəbiristanlıq” bir çox azərbaycanlı ulduz və blogerlərin “sevimli” yeridir ki, onlar da bu paslanmış gəmilərin fonunda fotosessiya və videolar çəkirlər. Ancaq dəniz suyunun neft məhsulları və zibillə çirklənməsinə baxmayaraq, orada daha çox balıq tutmağa davam edən balıqçılara rast gəlmək olar.
Qeyd edək ki, gəmilərin daha bir “qəbiristanlığı” Böyük-Zirə (keçmiş Nargin) adasında yerləşir. İki dünya müharibəsi dövründə bu adada hərbi əsir düşərgəsi, həmçinin SSRİ dövründə orada kiçik dəniz bazası da olub.
