ASCO-nun Azərbaycan Dövlət Dəniz Akademiyasının (ADDA) IV kurs tələbələri üçün diplomqabağı təcrübə mərhələsi start götürüb. Təcrübə proqramı çərçivəsində tələbələr müxtəlif gəmiçilik qurumlarında praktiki biliklərini artıracaqlar.
Təcrübəyə cəlb olunan tələbələrdən 57 nəfəri Xəzər Dəniz Neft Donanmasında (XDND), 40 nəfəri isə Dəniz Nəqliyyatı Donanmasında (DND) təcrübə keçəcək. Bundan əlavə, 15 nəfər digər gəmiçilik şirkətlərində, 3 nəfər isə Dövlət Dəniz və Liman Agentliyində (DDLA) təcrübə proqramına qatılacaq.
Bu gün XDND və DND-də təcrübəyə başlayan tələbələrə müvafiq idarələrdə texniki təhlükəsizlik qaydaları ilə bağlı təlimat verilib. Təlimin əsas məqsədi təhlükəsizlik normalarının izah edilməsi və tələbələrin əməyin mühafizəsi qaydalarına riayət etmələrinin təmin olunmasıdır.
Diplomqabağı təcrübə tələbələrin nəzəri biliklərini təcrübədə tətbiq etmələri üçün vacib mərhələ hesab edilir və onların gələcək peşə fəaliyyətinə mühüm töhfə verəcək
asco.az
