Suriyada yeni hakim rejim “CMA CGM”-nin Latakiya limanındakı konteyner terminalının icarə şərtlərinə yenidən baxıb və fransız gəmiçilik şirkətinə obyektin dəyişdirilmiş şərtlərlə istismarını davam etdirməyə icazə verib.
“Seanews.az” xəbər verir ki, bu barədə “The Maritime Executive” portalı məlumat yayıb.
Marseldə yerləşən nəqliyyat və logistika qrupu “CMA CGM” 2009-cu ildə keçmiş prezident Bəşər Əsədin dövründə Suriya hökuməti ilə konteyner terminalını idarə etmək üçün müqavilə imzalayıb. Terminal beş il uzadılmaq imkanı ilə on il müddətinə icarəyə verilib. İcarə müqaviləsinin müddəti 2019-cu ildə başa çatdıqdan sonra “CMA CGM” onu 2024-cü ilə qədər uzadıb. Ötən il Əsəd hökuməti şirkətə 30 illik daha uzun icarə müddəti təklif etmişdi.
“Reuters”-in məlumatına görə, yeni rejimin liman rəhbərliyi “CMA CGM” ilə müqaviləni bəzi dəyişikliklərlə qüvvədə saxlamaq qərarına gəlib. Dəyişikliklərə yenidən işlənmiş icarə müddəti və operatorla ölkənin yeni hökuməti arasında gəlirin bölüşdürülməsi daxildir.
Qeyd edək ki, “CMA CGM” dünyanın üçüncü ən böyük konteyner daşıma şirkətidir. Beş qitədə 400-dən çox limana xidmət göstərən şirkətin donanmasına 620 gəmi daxildir.
