Azərbaycan Dövlət Dəniz Akademiyasının (ADDA) “Gəmiqayırma və gəmi təmiri mühəndisliyi” ixtisası üzrə IV kurs tələbələri üçün diplomqabağı istehsalat təcrübəsi “AZCON Holding”in nəzdində fəaliyyət göstərən Bakı Gəmiqayırma Zavodu MMC-də (BGZ) təşkil edilmişdir.
Təcrübə iştirakçıları onlar üçün əvvəlcədən tərtib olunmuş proqram əsasında praktiki biliklər əldə etmiş və təcrübənin sonunda yekun hesabatlar hazırlamışlar. Təcrübənin qiymətləndirilməsi iki mərhələdə həyata keçirilmişdir:
- Birinci mərhələdə qiymətləndirmə BGZ-də yaradılmış komissiya tərəfindən aparılmış və nəticələr protokollaşdırılaraq ADDA-ya təqdim olunmuşdur;
- İkinci mərhələdə isə qiymətləndirmə ADDA-nın daxili komissiyası tərəfindən həyata keçirilmişdir.
Qiymətləndirmə sistemi üzrə tələbələr ümumilikdə 100 bal toplamaq imkanı əldə etmişlər: bunun 50 balı müəssisədə, digər 50 bal isə Akademiyada təşkil olunan müdafiə mərhələsində verilir.
12 iyun 2025-ci il tarixində Bakı Gəmiqayırma Zavodunun Təlim və İnkişaf bölməsinin rəhbəri, eyni zamanda BGZ-də tələbələrin qiymətləndirilməsi zamanı təcrübə üzrə komissiya sədri olmuş Nəcəf Mustafayev ADDA-da keçirilən müdafiə mərhələsində iştirak etmişdir. Təqdimatlar zamanı tələbələr dörd ay ərzində qazandıqları nəzəri və praktiki bilikləri əhatəli şəkildə təqdim etmiş, peşə bacarıqlarını nümayiş etdirmişlər.
Qiymətləndirmənin sonunda BGZ-nin nümayəndəsi təcrübəni müvəffəqiyyətlə başa vurmuş tələbələrin nəticələrini yüksək qiymətləndirərək onlara sertifikatlar təqdim etmiş və gələcək karyeralarında uğurlar arzulamışdır.
Azərbaycan Dövlət Dəniz Akademiyası olaraq Bakı Gəmiqayırma Zavodu MMC-yə tələbələrimizə göstərdikləri dəstəyə görə təşəkkürümüzü bildirir, gələcəkdə də bu cür səmərəli və uğurlu əməkdaşlığın davam edəcəyinə inanırıq.
adda.edu.az
