Beynəlxalq Təsnifat Cəmiyyətləri Assosiasiyası (IACS) 2025-ci il ərzində gəmilərin qəza enerji təchizatı sistemlərinə dair həyata keçirilən genişmiqyaslı təftiş kampaniyasının nəticələrini dərc edib.
“Tokyo MoU” tərəfindən “simulyasiya edilmiş qara nöqtə” testlərinin etibarlılığı ilə bağlı xəbərdarlıqdan sonra başladılan kampaniya çərçivəsində 12 ay ərzində ümumilikdə 36 723 gəmi yoxlanılıb. Gəmilərin 97 faizdən çoxunda ciddi problem aşkar edilməsə də, 853 gəmidə (2,32%) müxtəlif nöqsanlar qeydə alınıb.
Müəyyən edilən əsas çatışmazlıqlar arasında sürətli bağlanan klapanların nasazlığı (22%), idarəetmə blokları və elektrik dövrələrində problemlər (16%), eləcə də qəza dizel generatorlarının işə salınma sistemlərində qüsurlar (14%) yer alıb.
Hesabatda qeyd olunur ki, geniş tətbiq edilən simulyasiya testləri real enerji kəsintisi zamanı bütün dövrələri tam şəkildə yoxlamır və bu, heyətdə sistemlərin tam hazır olması ilə bağlı yanlış təsəvvür yarada bilər. Eyni zamanda bir çox gəmidə Təhlükəsizliyin İdarə Edilməsi Sistemləri (SMS) çərçivəsində real şəraitə yaxın enerji kəsintisi testləri üçün kifayət qədər ətraflı prosedurların olmadığı vurğulanıb.
IACS əldə olunan nəticələr əsasında SOLAS tələblərinə uyğunluğun gücləndirilməsi üçün ISM auditləri zamanı nəzarətli testlərin daha geniş tətbiqini, tez-tez nasazlıq yaradan komponentlər üzrə yoxlama intervallarının yenidən nəzərdən keçirilməsini və simulyasiya test standartlarının unifikasiyasını tövsiyə edir. Qurumun fikrincə, bu tədbirlər fövqəladə hallarda enerji sistemlərinin etibarlılığını artıraraq dəniz təhlükəsizliyinə mühüm töhfə verəcək.
Seanews.az
