Xəzər dənizinin dibi ilə çəkilən və regionun telekommunikasiya sektorunda ən iri meqalayihələrdən biri hesab olunan Trans-Xəzər sualtı fiber-optik rabitə xəttinin (FKX) dəniz hissəsinin tikinti və montaj işləri uğurla yekunlaşıb.
Denizxeber.az-ın Qazaxıstan Baş nazirinin rəsmi informasiya portalına istinadla verdiyi məlumata görə, sualtı kabel şəbəkəsi Xəzər akvatoriyasından keçərək Qazaxıstan sahilinə təhlükəsiz şəkildə çatdırılıb və çıxarılıb. Bununla da “Qazaxtelekom” SC və “AzerTelecom International” şirkətinin birgə tərəfdaşlığı ilə icra olunan strateji dəniz layihəsinin ən mürəkkəb və məsuliyyətli hidrotexniki mərhələsi tamamlanıb.
- Asiya-Avropa rəqəmsal körpüsü: Aktau və Sumqayıt dəniz terminallarını birləşdirən xətt Asiya ilə Avropa arasında məlumatların (data) yüksək sürətlə və birbaşa ötürülməsini təmin edən əsas rəqəmsal dəhlizə çevriləcək.
- Geosiyasi və tranzit müstəqilliyi: Xəzərdən keçən bu transmilli xətt iki ölkənin rəqəmsal infrastrukturunu birləşdirərək beynəlxalq dəniz və quru rabitə şəbəkələrinin etibarlılığını artıracaq, Azərbaycan və Qazaxıstanın tranzit potensialını daha da gücləndirəcək.
