Türkiyənin Nəqliyyat və İnfrastruktur naziri Abdulkadir Uraloğlu İstanbul və Çanaqqala boğazlarında gəmi keçidlərinin necə idarə olunduğu barədə ictimaiyyətə məlumat verib.
Nazir 30 aprel 2025-ci il tarixində sosial şəbəkə hesabında paylaşdığı videoda qeyd edib ki, boğazlardan keçən hər bir gəmi əvvəlcədən hərəkət planı təqdim edir. Daha sonra bələdçi kapitan gəmiyə qalxır və Gəmi Hərəkətinə Nəzarət Xidməti (VTS) ilə koordinasiyalı şəkildə hərəkət təmin olunur.
Abdulkadir Uraloğlu bildirib ki, İstanbul və Çanaqqala boğazları dünyanın ən strateji su yollarından biri hesab olunur. Onun sözlərinə görə, bu keçidlərdə hər bir gəminin hərəkəti əvvəlcədən planlaşdırılır, naviqasiya prosesi tam nəzarət altında həyata keçirilir və təhlükəsizlik bütün mərhələlərdə izlənilir.
Nazir qeyd edib ki, Türkiyə boğazlarından ildə təxminən 40 min gəmi keçir və bu, bölgəni dünyanın ən sıx dəniz yol keçidlərindən birinə çevirir. Məhz bu səbəbdən hər bir keçid peşəkar yanaşma və dəqiq koordinasiya tələb edir.
Hazırda Türkiyə boğazlarında gəmi keçidləri beynəlxalq standartlara uyğun şəkildə, müasir nəzarət texnologiyaları vasitəsilə həyata keçirilir.
