Ukraynanın Odessa sahilləri yaxınlığında mülki ticarət gəmilərini hədəf alan növbəti qanlı hadisə baş verib. Türkiyənin “Okean Maritime” şirkətinə məxsus olan və heyətinin böyük hissəsi həmyerlilərimizdən ibarət “Atlas Bey” mülki ticarət gəmisi dron hücumuna məruz qalıb. Hadisə zamanı gəminin göyərtəsində 11 nəfər Azərbaycan vətəndaşı olub.
Denizxeber.az bildirir ki, “Oxu.Az”ın “Qafqazinfo”ya istinadən yaydığı məlumata görə, “Azərbaycan Dənizçilərinə Dəstək” İctimai Birliyinin sədri İlham Nəsirov amansız hücum nəticəsində gəminin kapitanı Səməd Nəsrullayevin öz vəzifə borcunu yerinə yetirərkən həlak olduğunu bildirib. Birlik sədri dənizçilik ictimaiyyəti adından mərhum kapitanın yaxınlarına və ailəsinə dərin hüznlə başsağlığı verib.
Hücumun dərhal ardından gəmidəki digər ekipaj üzvlərinin təxliyəsi həyata keçirilib. Kapitan istisna olmaqla, sağ qalan bütün dənizçilər Odessa şəhərində təhlükəsiz şəkildə sahilə çıxarılıblar.
Azərbaycan Respublikasının Xarici İşlər Nazirliyi (XİN) də baş vermiş insidentlə bağlı rəsmi açıqlama yayıb. Nazirliyin bəyanatında aşağıdakı məqamlar qeyd olunub:
XİN-in rəsmi məlumatından:
- Sahilə çıxarılan heyət üzvlərinin hazırkı vəziyyəti qənaətbəxşdir və nəzarət altındadırlar.
- Hadisə yerində kapitanın axtarışı və hadisənin təfərrüatlarının tam aydınlaşdırılması istiqamətində zəruri tədbirlərin görülməsi davam etdirilir.
Mülki naviqasiya xətlərində çalışan dənizçilərin təhlükəsizliyi məsələsi bu hadisə ilə yenidən regional gündəmin ən ağrılı mövzusuna çevrilib.
