Banqladeşin Çittaqonq limanının xarici reydində “Maersk” şirkətinə məxsus konteyner gəmisi ilə fider gəmi arasında toqquşma baş verib.
Hadisə Sinqapur bayrağı altında üzən, 2700 TEU tutumlu “Maersk Chattogram” gəmisi pilot stansiyasına yaxınlaşdığı zaman qeydə alınıb. İlkin məlumatlara görə, toqquşma nəticəsində gəminin sağ bort hissəsində gövdə örtüyü ciddi zədələnib və böyük yarıq əmələ gəlib.
Gəmi heyətinin açıqlamasına əsasən, zədə yalnız xarici gövdə ilə məhdudlaşıb, mühərrik və sükan idarəetmə sistemləri isə normal işlək vəziyyətdə qalır. “Maersk”in yerli nümayəndəliyi bildirib ki, gəmi təmirə göndərilməzdən əvvəl limanda yükünü boşaldacaq.
Hadisədə iştirak edən digər gəmi – 1999-cu il istehsalı olan “HR Turag” fider gəmisi əvvəllər “Maersk Arun” adı ilə eyni donanmada xidmət göstərib və 2023-cü ildən Banqladeş bayrağı altında istismar olunur.
Banqladeş Gəmiçilik Departamenti və liman rəhbərliyi insidentlə bağlı araşdırma aparıldığını açıqlayıb.
