“Ümumdünya Çaylar və Dənizlər Günü” və ya “Dünya Dəniz Günü”

496

Bir çox dövlətlər “Ümumdünya Çaylar və Dənizlər Günü”nü və ya “Dünya Dəniz Günü”nü bəzən fərqli tarixlərdə, əsas etibarilə isə hər il sentyabr ayının sonuncu bazar günü qeyd edir.
Ümumdünya Dənizlər Günü 1977-ci ilin noyabrında keçirilmiş Hökumətlərarası Dəniz Təşkilatı Assambleyasının 10-cu sessiyasında qəbul olunan qərara əsasən, 1978-ci ildən etibarən qeyd edilir. 1980-ci ilə qədər həmin gün martın 17-də qeyd olunurdu. Hazırda isə bu gün sentyabrın axırıncı həftəsində təşkil edilir.
“Ümumdünya Çaylar Günü” isə 2005-ci ildən qeyd edilməyə başlayıb. Həmin il BMT-nin təşəbbüsü ilə “Onillik həyat üçün su” kampaniyası keçirilib. Aksiya dünyadakı bütün su hövzələrinin mühafizəsini ictimaiyyətə çatdırmaq məqsədi daşıyıb. Beynəlxalq səviyyədə tanınmış ətraf mühitin və çayların mühafizəçisi Mark Angelo BMT-nin təşəbbüsünə cavab olaraq, Ümumdünya Çaylar Gününün təsis olunması təşəbbüsü ilə çıxış edib. Hazırda həmin gün dünyanın 60-dan çox ölkəsində milyonlarla insan tərəfindən müxtəlif kampaniya, tədbir və aksiyalarla qeyd edilir.
Bu günün əlamətdar hadisə kimi qeyd olunduğu tarix həmin hər bir ölkənin Beynəlxalq Dəniz Təşkilatının üzvləri tərəfindən təyin olunur. Bu gün ictimaiyyətin diqqətini gəmiçiliyə və dənizlərin mühafizəsinə cəlb etmək məqsədi daşıyır.
Ənənəvi olaraq Dəniz Günü dənizlərin və okeanların insanlar üçün əhəmiyyətindən, sualtı dünyanın sərvətlərindən, həmçinin hər bir fərdin onun qorunması üçün nə edə biləcəyindən bəhs edən konkurs, festival formasında keçirilir. Adətən ictimai təşkilatlar bu bayramı dənizlərin qorunması, çimərliklərin təmizlənməsi üçün mitinqlərin və yürüşlərin keçirilməsi ilə qeyd edirlər.