Xəzər dənizinin Azərbaycan sektorunda Əlif Hacıyev adına elmi-tədqiqat gəmisi ilə keçirilən ekoloji monitorinqlər başa çatıb.
“Report” xəbər verir ki, bu barədə ekspedisiya qrupunun rəhbəri, Xəzər Kompleks Ekoloji Monitorinq İdarəsinin rəisi Nazim Mahmudov məlumat verib.
O qeyd edib ki, Ekologiya və Təbii Sərvətlər, Elm və Təhsil nazirlikləri, Dövlət Neft Şirkəti və Bakı Beynəlxalq Dəniz Ticarəti Limanının mütəxəssislərindən ibarət ekspedisiya qrupu tərəfindən keçirilən monitorinqlər zamanı Xəzər dənizinin hidrobioloji və hidrokimyəvi vəziyyəti öyrənilib, hidrometeoroloji ölçmələr aparılıb.
Monitorinqlər zamanı 19 məntəqə üzrə su, zooplankton, bentos və dib çöküntüsü olmaqla 208 nümunə götürülüb, su bioloji resurslarının ehtiyatları öyrənilib, quşların miqrasiyasının vizual müşahidəsi aparılıb.
Eyni zamanda ekspedisiya qrupu tərəfindən yerli və xarici şirkətlərin neft-qazçıxarma müəssisələrinə aid özül və platformalar ətrafında, Cənub-Şərqi Qoltuq, Kür dili və Lənkəran məntəqələrində də tədqiqatlar keçirilib.
