“Beijing Highlander Digital Technology Co.” tərəfindən Çinin Haynan əyalətinin Linqşui Li muxtar dairəsində dünyanın ilk kommersiya sualtı məlumat mərkəzi yaradılıb.
AZƏRTAC xəbər verir ki, bu barədə “Çhina Daily” qəzeti məlumat yayıb və yeniliyi “əhəmiyyətli texnoloji irəliləyiş” adlandırıb.
Qəzet yazır ki, bu qurğu təkcə məlumatların saxlanması mərkəzi deyil, həm də 60 min adi kompüterə ekvivalent olan güclü “superkompüter” funksiyasını yerinə yetirir və cəmi 30 saniyə ərzində 4 milyon yüksək dəqiqlikli təsviri emal edə bilir. “China Telecom” və “Tencent” kimi iri şirkətlər onun xidmətlərindən istifadə edən yeddidən çox qurumun arasında yer alıb.
Dənizaltı məlumat mərkəzi 25 il xidmət müddəti ilə dizayn edilib və bu yaxınlarda quraşdırılıb, onun çəkisi təxminən 1300 metrik ton və dərinliyi 35 metrə çatır. Mərkəzin əsas avadanlığı enerji paylanması, şəbəkə və monitorinq üçün alt sistemləri əhatə edən dəniz kabelləri vasitəsilə sahil stansiyasına qoşulur.
Bu innovativ quraşdırma dəniz suyundan istifadə edərək təbii soyutmanı təmin edir, enerji, su və torpaqdan istifadəni əhəmiyyətli dərəcədə azaldır, eyni zamanda, daha yüksək hesablama gücü sıxlığı, gücləndirilmiş təhlükəsizlik və minimum şəbəkə gecikməsi təklif edir.
Layihənin məqsədi 100 modulu yerləşdirməkdir ki, bu da ənənəvi torpaq əsaslı məlumat mərkəzləri ilə müqayisədə əhəmiyyətli enerji və resurs qənaəti təklif edir. Soyutma üçün qravitasiya istilik borusu texnologiyasından və dəniz suyundan istifadə edir, həmçinin enerji səmərəliliyini 40-60 faiz artırır. Bu quraşdırma nəinki torpaq resurslarına qənaət edir, həm də serverin işləməsi üçün sabit, tozsuz və oksigensiz mühit təmin edir, beləliklə, elektron xətaları azaldır.
