Çin Hind-Sakit okean bölgəsində hərbi mövcudluğunu və sualtı qayıq imkanlarını artırmaq istiqamətində növbəti addımını atıb.
Denizxeber.az bildirir ki, Pekinin yeni nəsil sualtı qayığı ABŞ-də ciddi narahatlığa səbəb olub. May ayında “BlackSky” tərəfindən Şanxaydakı “Jiangnan” Gəmiqayırma Zavodunda tikilməkdə olan yeni hücum sualtı qayığının görüntüləri dərc edilsə də, rəsmi Pekin məsələ ilə bağlı susqunluğunu qoruyur.
Hərbi ekspertlər yeni qayığın Çinin mövcud “Type 093” (Şanq sinfi) modelinin təkmilləşdirilmiş versiyası və ya tamamilə yeni bir sinif olduğunu bildirirlər. “Perceptum” tədqiqat şirkətinin təsisçisi Timoti Hit isə nəşrə müsahibəsində qayığın tamamilə yeni sinfə aid olduğunu vurğulayıb.
Təxminən 120 metr uzunluğunda və 10 metr enində olan sualtı qayıq daha kiçik qüllə quruluşuna və qısa gövdəyə malikdir. Bu dizayn dəyişiklikləri sualtı sürtünməni azaldır və gəminin sonar sistemləri, eləcə də P-8 “Poseidon” patrul təyyarələri tərəfindən aşkarlanmasını çətinləşdirir. Nüvə, yoxsa ənənəvi enerji sistemi ilə işlədiyi hələlik dəqiqləşməyən bu sualtı qayıq Pekinin dəniz modernləşdirməsinin bariz nümunəsidir. Qeyd edək ki, Çin 2021–2025-ci illər ərzində hərbi dəniz inventarına 10 yeni sualtı qayıq əlavə edib.
