ABŞ-də Hərbi Dəniz Qüvvələrinin sualtı qayıqlarının inşası və təmiri üçün mövcud istehsal güclərinin kifayət etmədiyi açıqlanıb.
Denizxeber.az “RIA Novosti”-ə istinadən xəbər verir ki, ABŞ dövlət auditi sənədlərinin təhlilinə əsasən gəmiqayırma zavodlarının həddindən artıq yüklənməsi və quru dokların çatışmazlığı sualtı qayıqların uzun müddət hərəkətsiz qalmasına səbəb olur.
Sənəddə qeyd olunur ki, son 10 il ərzində ABŞ Hərbi Dəniz Qüvvələri təmir işlərinin gecikdirilməsi və istismarda olan çoxməqsədli sualtı qayıqların boş dayanması səbəbindən 15 min gündən çox istismar vaxtı itirib. Bunun ABŞ büdcəsinə təxminən 3,4 milyard dollar əlavə xərc yaratdığı bildirilir.
Məlumata görə, 2016-cı ildən 2025-ci maliyyə ilinədək ABŞ tərsanələri çoxməqsədli sualtı qayıqların əsaslı təmir işlərinin yalnız təxminən 11 faizini vaxtında başa çatdıra bilib.
İstismar müddətini başa vurmuş sualtı qayıqlar da ayrıca problem yaradır. Onların tamamilə donanmadan çıxarılmasından əvvəl reaktorlarındakı nüvə yanacağının boşaldılması tələb olunur. Lakin bu prosesin həyata keçirilməsi üçün boş quru dok lazımdır.
Audit sənədinə əsasən, tərsanələrdə quru dokların çatışmazlığı səbəbindən istismardan çıxarılmalı olan sualtı qayıqların utilizasiyası prosesi də ləngiyir.
Beləliklə, ABŞ gəmiqayırma sənayesində mövcud infrastrukturun, xüsusilə quru dokların məhdudluğu həm yeni sualtı qayıqların inşasının sürətləndirilməsinə, həm də mövcud donanmanın texniki hazırlıq səviyyəsinin qorunmasına mane olan əsas amillərdən biri kimi göstərilir.
