ABŞ Ədliyyə Nazirliyi 2024-cü ilin martında Baltimorda körpünün uçmasına səbəb olan “Dali” konteyner gəmisinin operatorları və texniki nəzarətçisi Radhakrişnan Kartik Nairə qarşı 18 maddə üzrə cinayət ittihamı irəli sürüb.
İttihamlar “Synergy Marine” (Sinqapur) və “Synergy Maritime” (Hindistan) şirkətlərinə qarşı sui-qəsd, hadisə barədə Sahil Mühafizəsinə məlumat verməmək, istintaqa mane olmaq və yalan ifadə vermək kimi ağır iddiaları əhatə edir.
İstintaq materiallarında bildirilir ki, qəzanın əsas səbəbi gəmidə həyata keçirilmiş qeyri-qanuni texniki dəyişikliklər olub. Məlumata görə, heyət generatorların yanacaqla təminatı üçün nəzərdə tutulmayan yuma pompasından istifadə edib.
İlk elektrik kəsintisindən sonra həmin sistemin avtomatik işə düşməməsi nəticəsində gəmi ikinci dəfə enerji itirib və idarəetməni tam itirərək körpüyə çırpılıb.
ABŞ Ədliyyə Nazirliyi hesab edir ki, düzgün yanacaq nasoslarından istifadə edilsəydi, qəzanın qarşısını almaq mümkün ola bilərdi.
İttihamnamədə həmçinin xərclərə qənaət məqsədilə təhlükəsizlik prosedurlarının pozulması və ətraf mühitə zərər vurulması maddələri də yer alır.
Hadisə 6 yol işçisinin ölümü və təxminən 5 milyard dollar iqtisadi itki ilə nəticələnib. İyunun 1-də başlayacaq mülki məhkəmə prosesindən əvvəl irəli sürülən bu ittihamların gəmi sahiblərinin məsuliyyəti məhdudlaşdırmaq cəhdlərinə ciddi təsir göstərəcəyi bildirilir.
