Norveç hökuməti 2029-cu ildən etibarən ölkənin kontinental şelfində fəaliyyət göstərən ofşor gəmiləri üçün istixana qazı emissiyalarının azaldılmasını nəzərdə tutan yeni qaydalar tətbiq edib.
Avropa İttifaqı ilə iqlim sazişi çərçivəsində hazırlanan tənzimləməyə əsasən, gəmi operatorlarından emissiya intensivliyini 2029–2031-ci illərdə 10 faiz, 2038–2040-cı illərdə isə 40 faiz azaltmaq tələb olunur. Şelfdə 30 gündən az fəaliyyət göstərən gəmilər isə bu tələblərdən azad ediləcək.
Yeni qaydaların ümumilikdə təxminən 1,6 milyon ton CO₂ ekvivalentində emissiya azalmasına səbəb olacağı və hidrogen, ammonyak kimi alternativ yanacaqlara tələbatı artıracağı gözlənilir.
Norveçin “Eidesvik” şirkəti artıq “Viking Energy” adlı ofşor gəmisinin ammonyak yanacağına keçirilməsi üzrə layihəyə başlayıb. Layihə tamamlandıqdan sonra həmin gəmi dünyada ammonyak yanacağı ilə işləyən ilk ofşor gəmi olacaq.
Bununla yanaşı, hökumətin yeni qaydalarda bioyanacaqdan istifadəni uyğunluq meyarı kimi qəbul etməməsi sahə nümayəndələrinin narazılığına səbəb olub. Norveç Gəmi Sahibləri Assosiasiyasının baş direktoru Knut Arild Hareide bildirib ki, bioyanacaq mövcud donanmada emissiyaların sürətlə azaldılması üçün ən əlçatan vasitədir və onun qəbul edilməməsi gəmi sahiblərini daha baha və məhdud alternativlərə yönəldəcək.
Sənaye nümayəndələri hesab edirlər ki, vahid etirazlara baxmayaraq tətbiq olunan bu regional qaydalar biznes mühitində müəyyən qeyri-müəyyənlik yarada bilər.
Seanews.az
