Çin 16 MVt gücündə külək turbini üçün nəzərdə tutulmuş dünyanın ilk və ən böyük üzən gərginlik ayaqlı platformasını (Tension-Leg Platform – TLP) Cənubi Çin dənizində quraşdırılmaq üçün istismara göndərib.
Denizxeber.az Seanews.az-a istinadən xəbər verir ki, Çjuhay şəhərindəki Qaolan limanında yığılan platformanın hündürlüyü 307 metrdən çox, çəkisi isə təxminən 8 min tondur.
Yeni TLP iyunun 28-də yola salınıb və Honkonqdan təxminən 250 kilometr cənub-şərqdə, 330 metr dərinlikdə yerləşən Lufeng neft yatağı yaxınlığında quraşdırılacaq.
Platforma istismara verildikdən sonra ildə təxminən 54 milyon kilovat-saat elektrik enerjisi istehsal edəcək. Həmin elektrik enerjisi sualtı kabellər vasitəsilə neft yatağının enerji şəbəkəsinə ötürüləcək. Bu, Çində bərpa olunan enerji mənbələrinin neft-qaz əməliyyatlarına inteqrasiya edildiyi ilk layihə olacaq.
Çin rəsmilərinin bildirdiyinə görə, ölkənin ümumi quraşdırılmış külək enerjisi gücü artıq 660 milyon kilovatı, dəniz külək enerjisi üzrə quraşdırılmış gücü isə 47 QVt-ı ötüb. Hazırda dünyada yeni istifadəyə verilən dəniz külək enerjisi güclərinin təxminən 78 faizi Çinə məxsusdur və ölkə bu sahədə qlobal lider mövqeyini qoruyur.
