“Bakı Beynəlxalq Dəniz Ticarət Limanı” QSC-nin Baş direktoru Taleh Ziyadov tanınmış “Techint” şirkətinin prezidenti Paolo Rocca ilə görüşüb. Görüş zamanı Ələt qəsəbəsində yaradılacaq Azad Ticarət Zonasında şirkətin regional distribusiya mərkəzinin yaradılması müzakirə olunub. Qonağa yeni Bakı Limanının inkişaf konsepsiyası və yaradılan Ələt Azad Ticarət Zonasının Azərbaycanın qeyri-neft sektorunun inkişafına və regional əməkdaşlığa, ticarət dövriyyəsinin artmasına ciddi töhfə verəcəyi barədə məlumat verilib.
Paolo Rocca öz növbəsində Ələt qəsəbəsində yaradılacaq Azad Ticarət Zonasından böyük gözləntilərinin olduğunu bildirib və məhz buna görə də region üzrə öz distribusiya mərkəzinin yeni Bakı Limanında yaratmaq istədikərini vurğulayıb.
Görüşdə İtaliyanın Azərbaycandakı fövqəladə və səlahiyyətli səfiri Campaolo Kutillo da iştirak edib.
“Techint” Latın Amerikasının ən böyük polad boru istehsal edən şirkətidir və neft-qaz sahəsində dünyanın ən böyük boru təchizatçılarındandır. 70 illik təcrübəyə və 19500 peşəkar heyətlə şirkət energetika, infrastruktur və arxitektura sektorlarında mühəndislik, təchizat və tikinti xidmətləri göstərir.
