Kaliforniyada evsizləri kruiz laynerində məskunlaşdırmaq istəyirlər

257

ABŞ-ın Kaliforniya ştatında Oklend Şəhər Şurasının sədri Rebekka Kaplan evsizlərin kruiz gəmisində yerləşdirilməsi təklifi ilə çıxış edib. Şəhər hakimiyyəti yanvar ayında təşəbbüsü müzakirə etməyə hazırlaşır.

Kaplan gəmilərin hər birində min nəfərə yaxın insanın məskunlaşdırılmasının mümkün olduğunu bildirib və qeyd edib ki, hazırda Oklendin küçələrində 3,2 minə yaxın insan yaşayır.

O bildirib ki, kruiz gəmiləri təbii fəlakətlərdən sonra xəsarət alanların yerləşdirilməsi və kütləvi tədbirlərdə əlavə yaşayış yeri kimi uğurla istifadə edilir. Layneri isə icarəyə götürmək olar.

Qeyd olunur ki, şəhərdən layihənin həyata keçirilməsi üçün böyük vəsait tələb olunmayacaq. Sakinlər isə qazanclarından asılı olaraq otaq üçün özləri ödəniş edəcəklər. Kaplanın sözlərinə görə, artıq kruiz gəmilərinə malik olan şirkətlər onunla əlaqə saxlayıblar.

Yerli limanın administrasiyasında isə layihə təhlükəli hesab olunur.