“Corvus Energy” şirkəti “Dolphin NxtGen” batareya enerji saxlama sistemləri (BESS) üçün DNV təsnifat cəmiyyətindən rəsmi kibertəhlükəsizlik sertifikatı əldə edib. Bu addım dəniz nəqliyyatında rəqəmsal təhlükəsizlik standartlarının gücləndirilməsi baxımından mühüm mərhələ kimi qiymətləndirilir.
Sertifikatlaşdırma prosesi çərçivəsində sistem arxitekturası, girişə nəzarət mexanizmləri, məlumatların qorunması və proqram təminatının təhlükəsiz uzaqdan yenilənməsi daxil olmaqla 50-dən çox texniki funksiya müstəqil ekspertlər tərəfindən yoxlanılıb. Qiymətləndirmə həmçinin gəmilərin monitorinqi və diaqnostikası üçün istifadə edilən “Lighthouse” rəqəmsal platformasını da əhatə edib.
Mütəxəssislərin fikrincə, müasir gəmiçilikdə rəqəmsal idarəetmə sistemlərindən asılılığın artması kibertəhlükəsizlik risklərini də yüksəldir. Xüsusilə hibrid və sıfır emissiyalı gəmilərdə enerji saxlama sistemləri kritik infrastruktur sayıldığından, onların kiberhücumlardan qorunması dəniz təhlükəsizliyinin əsas tələblərindən birinə çevrilib.
“Corvus Energy”nin baş icraçı direktoru Fredrik Vitte bildirib ki, kibertəhlükəsizlik artıq avadanlığın etibarlılığı qədər vacib bir amildir və dəniz sənayesində dayanıqlı təhlükəsizlik sistemlərinin formalaşmasında həlledici rol oynayır.
Şirkətin texnologiyaları dünyada sıfır emissiyalı gəmilərin böyük hissəsində istifadə olunur və yeni sertifikat dəniz nəqliyyatında rəqəmsal təhlükələrə qarşı daha yüksək standartların tətbiqinə töhfə verir.
Seanews.az
