ABŞ Silahlı Qüvvələri Oman körfəzində İran bayrağı altında üzən “Hasna” tankerinə qarşı əməliyyat həyata keçirdiyini açıqlayıb.
Bu barədə ABŞ Mərkəzi Komandanlığının (CENTCOM) yaydığı məlumatda bildirilib.
Açıqlamaya görə, mayın 6-da İran limanına doğru hərəkət edən tanker çoxsaylı xəbərdarlıqlara baxmayaraq marşrutunu dəyişməyib. Bundan sonra ABŞ qüvvələri “Abraham Lincoln” aviadaşıyıcısından havaya qalxan “F/A-18 Super Hornet” qırıcı-bombardmançısı vasitəsilə tankerin sükan idarəetmə sistemini hədəfə alıb.
CENTCOM-un məlumatında qeyd olunur ki, həyata keçirilən əməliyyat nəticəsində “Hasna” tankeri İran istiqamətində hərəkətini davam etdirə bilməyib.
Hadisə ilə bağlı İran tərəfi hələlik rəsmi açıqlama verməyib.
