Hörmüz boğazı vasitəsilə axınların azalması qlobal mayeləşdirilmiş təbii qaz (LNG) qiymətlərinin yüksək səviyyədə qalmasına səbəb olub və ABŞ daxili qaz qiymətləri ilə beynəlxalq bazarlar arasında fərqi artırıb.
Bu barədə ABŞ Enerji İnformasiya Administrasiyasının (EIA) hesabatında deyilir.
Yaxın Şərqdəki münaqişə və Hörmüz boğazında yaranan məhdudiyyətlər qlobal LNG təchizatının təxminən 20 faizinin bazardan çıxmasına gətirib çıxarıb. Nəticədə bazar şərtləri dəyişib və qlobal LNG istehsalı illik müqayisədə 8 faiz azalıb.
Aprel ayında ABŞ-nin LNG ixrac gücü gündəlik təxminən 0,9 milyard kubfut artıb. İlin birinci rübündə ölkədə təbii qaz istehsalı orta hesabla 120,2 milyard kubfut/sutka təşkil edib ki, bu da ötən ilin eyni dövrü ilə müqayisədə 4 faiz çoxdur.
Hesabatda bildirilir ki, təbii qaz hasilatının 2027-ci ilədək artmaqda davam edəcəyi gözlənilir. Bu artım yüksək neft qiymətlərinin həm xam neft, həm də qaz hasilatını dəstəkləməsi ilə izah olunur.
Proqnozlara görə, ABŞ-də elektrik enerjisinə tələbat bu il 1,3 faiz artaraq təxminən 4250 milyard kilovat-saat olacaq, 2027-ci ildə isə əlavə 3,1 faiz artım gözlənilir.
Yaşayış sektorunda elektrik enerjisi qiymətlərinin bu il təxminən 5 faiz artacağı, daha sonra isə artım tempinin yavaşlayacağı bildirilir. Eyni zamanda, kommunal miqyaslı günəş enerjisi istehsalının da 1,4 faiz artacağı proqnozlaşdırılır.
