Argentinalı hüquq-mühafizə orqanları göyərtədə təcili tibbi təxliyə həyata keçirilmədiyi üçün xəstələnərək vəfat edən 37 yaşlı balıqçı Matias Oskar Vilçezin ölümü ilə bağlı araşdırma aparır. Federal məhkəmə gəmi kapitanının və gəmiyə məsafədən tibbi məsləhət verən sahil həkiminin hərəkətlərini qiymətləndirir.
Vilçez aprelin ortalarında Mər-del-Plata limanından dənizə çıxan “Don Nicola” balıqçı gəmisində növbəli heyət üzvü kimi işə başlayıb. Aprelin 24-də dənizdə olarkən onun sinəsində kəskin ağrılar yaranıb.
Gəminin kapitanı vəziyyət barədə Argentina Sahil Mühafizəsinin həkiminə məlumat verib. Həkim helikopterlə təxliyəyə ehtiyac görməyərək gəminin dərhal limana qayıtmasını və xəstənin sahilə çatdırılmasını tövsiyə edib. Həmin vaxt gəmi limandan cəmi 25 dəniz mili məsafədə olub.
Bununla belə, araşdırılan səbəblərdən gəmi dərhal kursunu limana yönəltməyib. Bu müddətdə balıqçıya ilkin olaraq mədə dərmanı təyin edilib.
Ailənin vəkilinin sözlərinə görə, Vilçez sonrakı 17 saat ərzində gəmidə qalıb və vəziyyəti getdikcə ağırlaşıb. O, həyat yoldaşına göndərdiyi mesajda helikopterlə təxliyə edilməsini xahiş edib.
Aprelin 25-i səhər saatlarında isə heyət üzvləri onu kabində ölmüş vəziyyətdə aşkarlayıblar. Məhkəmə-tibbi ekspertiza ölümün infarkt nəticəsində baş verdiyini müəyyən edib.
Federal prokurorluq hadisə ilə bağlı “ölümlə nəticələnən köməksiz vəziyyətdə qoyma” maddəsi üzrə istintaq başladıb. Həm gəmi kapitanı, həm də sahil həkimi iş üzrə araşdırmaya cəlb olunub. Həkim isə gəminin dərhal limana qayıtması barədə göstəriş verdiyini və məsuliyyət daşımadığını bildirir.
Seanews.az
