Keniya hökuməti Mombasa şəhərində yerləşən Likoni bərə keçidi üçün yeni yüksək tutumlu gəmi almağa hazırlaşır.
Təxminən 23 milyon dollar dəyərində olacaq bərənin yaxın altı ay ərzində istismara verilməsi planlaşdırılır.
Likoni keçidi Mombasa adasının cənub hissəsini materiklə birləşdirən əsas nəqliyyat marşrutlarından biridir. Gündəlik olaraq burada 300 mindən çox sərnişin və minlərlə avtomobil daşınır. Lakin köhnəlmiş bərə donanması səbəbindən son illərdə keçiddə sıxlıq, texniki nasazlıqlar və təhlükəsizlik problemləri artıb.
Sosial şəbəkələrdə yayılan görüntülərdə sərnişinlərin nəzarətsiz şəkildə bərələrə minməsi, uzun növbələr və təhlükəli vəziyyətlər əks olunub. Bildirilir ki, istifadə olunan bəzi bərələrin dənizəyararlılıq sertifikatları illər əvvəl ləğv edilib.
Keniya Prezidenti Uilyam Ruto yeni bərə ilə yanaşı, Mombasada nəqliyyat və hərəkət infrastrukturunun yaxşılaşdırılması üçün əlavə maliyyə ayrılacağını açıqlayıb.
Seanews.az
