Cənubi Koreyanın “HD Hyundai” şirkəti və Sinqapurun “BW LNG” şirkəti dünyanın ilk üç çənli LNG daşıyıcılarının inşasına başlayır. Yeni layihə gəminin ölçülərini böyütmədən yükdaşıma qabiliyyətini 2 800 kubmetrədək (1,6 faiz) artırmağa və böyük gəmilər üçün terminal məhdudiyyətlərindən yayınmağa imkan verir.
Denizxeber.az “Seanews.az”-a istinadən xəbər verir ki, 176 800 kubmetr tutumlu gəmilərin layihəsi “HD Hyundai” tərəfindən Fransanın GTT şirkəti, gəmi sahibi BW və DNV təsnifat cəmiyyətinin iştirakı ilə hazırlanıb. BW iyun ayında bu layihə üzrə ilk dörd gəminin sifarişini verib.
Üç çənli sistem 174 000 kubmetrlik ənənəvi LNG daşıyıcısında bir izolyasiyalı arakəsmənin çıxarılması hesabına əlavə yük sahəsi yaradır. Bununla yanaşı, çənlərin ümumi səth sahəsinin azalması gündəlik LNG buxarlanma itkilərini təxminən 6 faiz azaldır. Gəmilərdə yükün qismən doldurulmasına da imkan verən çevik sistem tətbiq olunacaq.
Yeni layihədə yükün çən daxilində hərəkətindən yaranan dinamik yüklərlə bağlı risklər güc hesablamaları, konstruktiv və istilik möhkəmləndirmələri vasitəsilə nəzərə alınıb. Gəmilərdə sınaqdan çıxmış “Mark III” membran texnologiyasından istifadə ediləcək.
Dörd gəmi “HD Hyundai Samho” tərəfindən inşa olunacaq və onların 2028-ci ilin dördüncü rübündən 2029-cu ilin üçüncü rübünədək təhvil verilməsi planlaşdırılır. Gəmilər aşağı təzyiqli, ikitaktlı ikiyanacaqlı WinGD X-DF 2.2 mühərrikləri və val generatorları ilə təchiz ediləcək.
