Hörmüz boğazındakı blokada və təhlükəsizlik risklərinə baxmayaraq, son doqquz gün ərzində ən çox tanker ötən gün boğazdan keçib.
Bu barədə gəmiçiliyi izləmə xidməti “Kpler” məlumat yayıb.
Məlumata görə, mayın 11-də Hörmüz boğazından quru yük, mayeləşdirilmiş qaz, neft məhsulları və taxıl daşıyan ümumilikdə 10 gəmi keçid edib. Bu, mayın 2-də qeydə alınan 14 gəmidən sonra ən yüksək göstərici hesab olunur.
Boğazdan keçən gəmilərdən beşi Körfəzdən çıxış edib, digər beşi isə Körfəzə daxil olub. Həmin gəmilərdən yeddisi quru yük, maye qaz, təmiz neft məhsulları və taxıl daşıyıb.
Gəmilərin əksəriyyəti İran, İraq, Birləşmiş Ərəb Əmirlikləri və Oman arasında fəaliyyət göstərib. Argentinadan gələn “Star Nasia” və Kanadanın “Star Despoina” tankerlərinin isə İrana taxıl daşıdığı bildirilib.
Bununla belə, Hörmüz boğazından keçən gəmilərin ümumi hərəkəti ABŞ–İran qarşıdurmasından əvvəlki səviyyə ilə müqayisədə hələ də təxminən 95 faiz aşağı olaraq qalır.
