“Kongsberg Maritime” şirkətinin “Höegh Autoliners”ə məxsus “Aurora” sinifli flaqman gəmisi əsasında hazırladığı yeni maşın şöbəsi simulyatoru modeli DNV-dən uyğunluq sertifikatı alıb.
Tam audit və nümayişdən sonra verilən bu beynəlxalq təsdiq simulyatorun DNV-nin dənizçilik standartlarına uyğunluğunu və mürəkkəb təlim proqramları üçün yüksək dəqiqliyə malik olduğunu göstərir.
9 100 avtomobil daşıma qabiliyyətinə malik “Aurora” sinifli gəmilər 2040-cı ilə qədər xalis sıfır emissiya hədəfi ilə layihələndirilib və amonyak kimi alternativ yanacaqlarla işləməyə hazırdır.
“Kongsberg Maritime” bu gəmilərin avtomatlaşdırma sistemləri, hərəkət mexanizmlərinin optimallaşdırılması və rəqəmsal həllərinin hazırlanmasında əsas texnoloji tərəfdaş kimi çıxış edir.
Yeni simulyatorun standart portfelə daxil edilməsi dəniz heyətlərinə bu mürəkkəb və ekoloji cəhətdən təmiz sistemləri real əməliyyatdan əvvəl daha dərindən öyrənmək imkanı yaradacaq.
Uyğunluq sertifikatının verilməsindən sonra “Höegh Aurora” modeli artıq dünya üzrə təlim mərkəzlərində istifadə oluna biləcək.
Seanews.az
