Panama Kanalı tarixində ilk dəfə olaraq qadın administrator təyin edilib.
Panama Prezidenti Xose Raul Mulinonun açıqlamasına görə, hazırda baş direktor müavini vəzifəsində çalışan mühəndis İlya Espino de Marotta 1 oktyabrdan etibarən Panama Kanalının administratoru kimi fəaliyyətə başlayacaq.
Kanal rəhbərliyi bildirib ki, Espino de Marotta beynəlxalq seçim prosesi nəticəsində müəyyən olunub. O, 40 ildən artıq peşəkar təcrübəyə, o cümlədən Panama Kanalında 35 illik fəaliyyətə malikdir və kanalın genişləndirilməsi kimi iri layihələrə rəhbərlik edib.
Təyinat Panama Kanalında yük axınının artdığı dövrə təsadüf edir. BIMCO-nun məlumatına görə, Yaxın Şərqdəki gərginlik və Hörmüz boğazı ətrafında yaranan risklər səbəbindən kanal üzərindən tanker daşımaları artıb.
Hazırda kanaldan gündə orta hesabla 38 gəmi keçir və su yolu maksimum gücə yaxın rejimdə fəaliyyət göstərir. Gəmilərin gözləmə müddəti və tranzit hərrac qiymətlərində də artım müşahidə olunur.
Panama Kanalı rəhbərliyi uzunmüddətli inkişaf planları çərçivəsində kanalın genişləndirilməsi, yeni liman terminallarının yaradılması və logistika infrastrukturunun inkişafı istiqamətində layihələrin davam etdiyini bildirib.
Seanews.az
