Malayziya sahillərində yerləşən “Sepat” üzən neft saxlama və boşaltma qurğusunda (FSO) xilasedici qayıqda aparılan texniki baxış zamanı qəza baş verib.
Hadisə zamanı dörd podratçı xilasedici qayığın göyərtəsində texniki yoxlama apararkən qayıq qəfil suya düşüb. İlkin məlumata əsasən, hadisəyə trosun qırılması və ya qarmaq sistemində yaranan nasazlıq səbəb olub.
Qəza nəticəsində yaralanan şəxslər Kuala-Terenqqanu şəhərindəki xəstəxanaya çatdırılıb. Onlardan üçü xəstəxanada həyatını itirib, bir nəfərin isə vəziyyətinin stabilliyi qorunur.
Şirkət əvvəlcə insidentin təlim zamanı baş verdiyini açıqlasa da, daha sonra hadisənin texniki xidmət işləri zamanı baş verdiyi təsdiqlənib.
Mütəxəssislərin sözlərinə görə, xilasedici qayıqlar hündürlükdə yerləşməsi və mürəkkəb mexaniki sistemlərə malik olması səbəbindən gəmiçilik sənayesində ən riskli avadanlıqlardan biri hesab olunur.
Seanews.az
