Azərbaycan Texniki Universitetində (AzTU) yeni təsis edilmiş AZSET – AZCON Mühəndislik və Texnologiya Məktəbinin fəaliyyətinə həsr olunan “Açıq qapı” günü təşkil olunub. Tədbirdə ölkənin müxtəlif ali təhsil müəssisələrində təhsil alan tələbələr fəal iştirak ediblər.
Denizxeber.az bildirir ki, universitetin rektoru Vilayət Vəliyev çıxış edərək bu unikal mühəndislik məktəbinin yaradılma məqsədləri və fəaliyyət istiqamətləri barədə ətraflı məlumat verib. Rektor bildirib ki, AzTU-nun nəzdində qurulan AZSET məktəbi Almaniyanın nüfuzlu Münxen Texniki Universitetinin (TUM) beynəlxalq akademik tərəfdaşlıq platforması olan “TUM International” təşkilatının birbaşa dəstəyi ilə fəaliyyət göstərəcək.
Layihə çərçivəsində tədris prosesi “TUMint”in akademik yanaşması, beynəlxalq kurikulumu, müasir tədris metodologiyası və qiymətləndirmə standartları əsasında xüsusi hazırlıq keçmiş yerli müəllimlər tərəfindən idarə olunacaq. Təhsildə yüksək nəticələr göstərən tələbələrin “TUM”un Münhen şəhərindəki əsas kampusuna tədris səfərləri təşkil ediləcək. Proqramı uğurla başa vuran məzunlar AzTU-nun dövlət nümunəli bakalavr diplomu ilə bərabər, həm də qlobal miqyasda tanınan “TUM International GmbH” sertifikatını əldə edəcəklər.
Tədbirə onlayn formatda qoşulan “TUM International” şirkətinin nümayəndəsi Aline Laucke qeyd edib ki, beynəlxalq səviyyəli mütəxəssislərin hazırlanmasını hədəfləyən bu intellektual mərkəzdə tədris tamamilə ingilis dilində aparılacaq. O, AZSET-də ilkin mərhələdə kompüter elmləri ixtisası üzrə kadr hazırlığına başlanılacağını qeyd edərək, bu istiqamətdə mövcud olan qabaqcıl beynəlxalq təcrübəni slaydlar vasitəsilə diqqətə çatdırıb.
“AZCON Holding”in İnsan kapitalının inkişafı və biznes tərəfdaşlıq şöbəsinin müdiri Tamerlan Ələkbərli isə AZSET məktəbini yüksək akademik göstəricilərlə bitirən məzunlar üçün holding ekosisteminə daxil olan aparıcı şirkətlərdə geniş karyera və iş imkanlarının yaradılacağını vurğulayıb.
Qəbul şərtləri və son müraciət tarixi
AZSET-in nümayəndəsi Lətifə Nəsibova tələbələrə qəbul prosedurları barədə geniş təqdimat edib. Proqramın əsas seçim kriteriyaları aşağıdakı kimidir:
- Hədəf auditoriyası: Azərbaycanın ali təhsil müəssisələrində müvafiq təhsil, təbiət, texniki və texnoloji ixtisaslar üzrə birinci kursu uğurla başa vurmuş tələbələr müraciət edə bilərlər.
- Akademik tələb: Namizədlərin birinci kursun hər iki semestri üzrə akademik göstəriciləri uğurlu olmalıdır.
- Dil biliyi: Tələbələrin ingilis dili səviyyəsi ən azı B2 və ya daha yuxarı olmalıdır.
- Son müraciət tarixi: Qəbul üçün nəzərdə tutulan daxili imtahana qeydiyyat cari ilin iyulun 15-dək aparılacaq.
Müsabiqədən və imtahanlardan uğurla keçən tələbələr cari təhsil ilində təhsillərini birbaşa ikinci kursdan etibarən bu xüsusi proqramda davam etdirmək hüququ qazanacaqlar. Tədbirin sonunda tələbələri maraqlandıran suallar ətraflı şəkildə cavablandırılıb.
