Cənub-Şərqi Asiyada yaşayan Bajau qəbiləsi genetik uyğunlaşma nəticəsində 13 dəqiqə nəfəsini saxlaya və 60 metr dərinliyə qədər suya dala bilən bir topluluğa çevrilib. Dalaqları daha böyük olan bu insanlar sahilə çıxdıqda isə müxtəlif narahatlıqlar yaşayırlar.
Denizxeber.az bildirir ki, orqanizmlərində baş verən genetik dəyişikliklərlə fərqlənən Bajau qəbiləsinin qeyri-adi həyat tərzi eşidənləri heyrətə gətirir. Oksigen balonundan istifadə etmədən dənizin 60 metr dərinliyinə enə bilən və yeddi gün ərzində suda yaşayaraq tam 13 dəqiqə nəfəsini saxlaya bilən bu insanlar sahilə çıxdıqda isə başgicəllənmə tutmaları keçirirlər.
Cənub-Şərqi Asiyanın toxunulmamış sularında həyatlarını tamamilə dənizə həsr edən Bajau qəbiləsi insanlıq tarixində heyrətamiz uyğunlaşma prosesinə nümunədir. Bu topluluq həyatlarının böyük hissəsini dənizin üzərində, taxta daxmalarda və qayıqlarda keçirir, quru ilə əlaqələrini demək olar ki, tamamilə kəsib.
Adi insan üçün suyun altında bir neçə dəqiqə qalmaq belə çətin olduğu halda, Bajau qəbiləsinin üzvləri heç bir köməkçi avadanlıqdan istifadə etmədən 13 dəqiqə ərzində nəfəs ala bilmirlər. Sadə taxta eynəklər və nizələrlə dənizin 60 metr dərinliyinə qədər enən bu insanlar okeanın dibində sanki qurudaymış kimi rahat şəkildə ov edə bilirlər. Bu qeyri-adi qabiliyyətin arxasında dayanan səbəbləri araşdıran alimlər genetik mutasiyanın təsirlərini müəyyən ediblər.
Uzun illərdir dənizlə sıx təmasda yaşayan Bajau qəbiləsinin bioloji quruluşunda mühüm dəyişikliklər baş verib. Genetik analizlər göstərib ki, bu topluluğun dalaqları adi insanlarla müqayisədə 50 faiz daha böyükdür. Bədən su ilə təmasda olduqda oksigen anbarı rolunu oynayan bu böyük dalaq qana daha çox qırmızı qan hüceyrəsinin sürətlə buraxılmasını təmin edir və bununla da onların su altında daha uzun müddət qalmasına imkan yaradır.
Bundan əlavə, dərin suların yaratdığı təzyiqə dözə bilmək üçün uşaqlıqda qulaq pərdələrini qəsdən deşmək ənənəsinin olduğu bildirilir. Bunun onların su altında daha rahat hərəkət etməsinə kömək etdiyi qeyd olunur.
Bajau qəbiləsinin göz bəbəkləri su altında işığın sınmasına uyğunlaşıb. Bu isə onlara balıqlar kimi suyun altında daha kəskin görmə imkanı verir. Lakin bu uyğunlaşmanın maraqlı yan təsiri də var: onlar sahilə çıxdıqda başgicəllənmə və ürəkbulanma kimi narahatlıqlar yaşayır, başqa sözlə, bir növ “quru xəstəliyi” keçirirlər.
Müasir dünyadan böyük ölçüdə təcrid olunmuş şəkildə yaşayan bu xalqın nə dəqiq kimliyi, nə də yaşları barədə məlumatların olmadığı bildirilir. Onlar zamanı yalnız Ayın hərəkətinə və qabarma-çəkilmə hadisələrinə əsasən hesablayırlar.
