“Petrobras” şirkətinin icarəsində olan lövbərbasdıran və yedək-təchizat gəmisi Rio-de-Janeyrodan təxminən 80 dəniz mili şimal-şərqdə saya oturub.
2010-cu il istehsalı olan “Skandi Amazonas” adlı AHTS tipli gəmi gecə saatlarında hərəkətdə olarkən dəniz dibindəki qayalığa çırpılıb. Braziliya Hərbi Dəniz Qüvvələrinin məlumatına görə, zərbə nəticəsində gəminin gövdəsi zədələnib və suyun daxil olması başlayıb. Kapitan batma və ya çevrilmə riskini azaltmaq üçün gəmini qəsdən saya oturdub.
Hadisə uzun sahil xətti və turizm obyektləri ilə tanınan Praya Kampista bölgəsi yaxınlığında baş verib.
Qəza zamanı gəmidə 29 nəfər olub. Onlardan 12-si yaxınlıqda olan digər gəmilərə təxliyə edilib, 17 nəfər isə vəziyyətin stabilləşdirilməsi və xilasetmə əməliyyatlarına hazırlıq məqsədilə göyərtədə saxlanılıb.
Məlumata görə, zərbədən sonra gəminin sağ maşın şöbəsinə su dolub və sağ mühərrik sistemi sıradan çıxıb.
