İsveçrənin “WinGD” şirkəti Braziliyanın “Vale” şirkəti tərəfindən uzunmüddətli icarəyə götürüləcək iki iritonnajlı yük gəmisi üçün etanolla işləyən mühərriklərin tədarükünə dair müqavilə imzalayıb.
Məlumata görə, “X-DF-M/E” tipli mühərriklər əsasən etanol yanacağı ilə işləmək üçün layihələndirilmiş ilk dəniz mühərrikləri olacaq. Altısilindrli mühərriklər Çinin “Beihai Shipbuilding” tərsanəsində “Shandong Shipping Corporation” üçün inşa olunan iki 325 000 dwt-lik filizdaşıyan gəmiyə quraşdırılacaq. Gəmilərin 2029-cu ilin əvvəlində təhvil verilməsi planlaşdırılır.
Yeni mühərriklər etanol, metanol və dəniz qazoylu ilə işləmək imkanına malikdir. “WinGD” şirkətinin nümayəndələri bu layihənin dənizçilikdə dekarbonizasiya prosesində etanolun praktik alternativ yanacaq kimi formalaşdığını göstərdiyini bildirirlər.
“Vale” şirkətinin hesablamalarına əsasən, ənənəvi ağır neft yanacağının etanolla əvəzlənməsi nəticəsində zərərli emissiyaların həcmi təxminən 90 faiz azala bilər.
Seanews.az
