Ədən körfəzində üzən tanker şübhəli yaxınlaşma ilə üzləşib. Hadisə zamanı gəminin təhlükəsizlik heyəti xəbərdarlıq atəşi açıb. Hadisənin Somali mənşəli dəniz quldurları ilə əlaqəli ola biləcəyi ehtimal edilir.
İnsident mayın 22-də Yəmənin nəzarətində olan Sokotra adasından təxminən 98 dəniz mili məsafədə baş verib. Tanker hərəkətdə olarkən göyərtəsində beş nəfər olan kiçik qayıq sürətlə gəminin yaxınlığına istiqamətlənib.
Məlumata görə, tankerin silahlı mühafizəçiləri vəziyyəti təhlükəli qiymətləndirərək xəbərdarlıq atəşi açıblar. Bundan sonra kiçik qayıq kursunu dəyişərək ərazidən uzaqlaşıb.
Avropa İttifaqının Hind okeanı üzrə Dəniz Təhlükəsizliyi Mərkəzi bildirib ki, bu, son bir həftə ərzində bölgədə qeydə alınan üçüncü oxşar hadisədir. Hazırda Somali sahillərində üç gəminin quldur qruplarının nəzarətində qaldığı qeyd olunur. Bunlar “MT Honour 25”, “Sward” və “Eureka” gəmiləridir.
Mərkəzin məlumatına əsasən, quldurlar “Eureka” tankerinin azad olunması müqabilində 3 milyon dollar məbləğində fidyə tələb edirlər.
Böyük Britaniyanın Dəniz Ticarət Əməliyyatları İdarəsi (UKMTO) Somali sahilləri və Somali hövzəsində quldurluq təhlükəsinin yüksək olaraq qaldığını vurğulayıb. Qurum bölgədən keçən gəmilərə sahildən minimum 150 dəniz mili uzaqda hərəkət etməyi və təhlükəsizlik tədbirlərini gücləndirməyi tövsiyə edib.
Seanews.az
