2026-cı ilin əvvəlindən etibarən Batumi Dəniz Limanı vasitəsilə Qazaxıstana məxsus 31 min ton yükün daşınması Trans-Xəzər Beynəlxalq Nəqliyyat Marşrutunun (Orta Dəhliz) artan əhəmiyyətini bir daha göstərir.
Denizxeber.az bildirir ki, bu yüklər Mərakeş, Türkiyə və digər ölkələrə ixrac istiqamətində yönləndirilib. Daşınma həcmlərində müşahidə olunan sabit dinamika Qazaxıstan, Gürcüstan və beynəlxalq bazarlar arasında logistika əlaqələrinin gücləndiyini təsdiqləyir.
Qara dənizdə yerləşən Batumi Limanı regionun ən qədim limanlarından biri olmaqla yanaşı, strateji tranzit qovşağı rolunu oynayır. 1878-ci ildə inşa edilən limanın infrastrukturu 11 körpü, neft terminalı, universal və konteyner terminallarını əhatə edir və ümumi illik ötürmə qabiliyyəti 21 milyon ton təşkil edir.
Qazaxıstanın “KazMunayGas” və “KazTransOil” şirkətlərinin Gürcüstandakı aktivləri Batumi Neft Terminalı vasitəsilə idarə olunur ki, bu da Xəzər-Qara dəniz logistika zəncirində inteqrasiya olunmuş modelin formalaşdığını göstərir.
Ümumilikdə bu göstəricilər Orta Dəhlizin yalnız regional deyil, həm də Avropa–Asiya ticarət axınlarında getdikcə daha stabil və alternativ marşrut kimi mövqeyini gücləndirdiyini təsdiqləyir.
