Bəzən insanın həyat yolunu bir uşaqlıq arzusu müəyyənləşdirir. Salyanın Kürqaraşlı kəndində, Kür çayının sahilində böyüyən balaca Ülfətin arzusu da üfüqün o tayına keçmək, dünyanı görmək və dənizlərin sirrini öyrənmək idi. 1989-cu il təvəllüdlü Ülfət Əzizovun uşaqlıq xəyalları onu addım-addım dünya okeanlarına və uzaq səfərlər kapitanı rütbəsinə qədər aparıb çıxarıb.
Akademiyadan başlayan böyük üfüqlər
Denizxeber.az bildirir ki, 2007-ci ildə orta məktəbi bitirən Ülfət Əzizov tərəddüd etmədən sənədlərini yalnız Azərbaycan Dövlət Dəniz Akademiyasının (ADDA) ixtisaslarına verir və birinci sırada yazdığı gəmi sürücülüyü fakültəsinə qəbul olur. Müsahibim dənizçiliyə başladığı ilk günü gülümsəyərək xatırlayır:
“Bəzən məndən soruşurlar ki, nə vaxtdan dənizçisiniz? Deyirəm ki, 2007-ci ilin avqustundan. Atamla birlikdə sənədlərimi akademiyaya təhvil verməyə gəlmişdik. Həmin gün Bakı buxtasında gəzinti gəmisinə mindim və özümü dənizçi hesab etməyə başladım”.
2008-ci ildə ilk təcrübə gəmisi ilə dənizçiliyin həm romantik, həm də ağır məsuliyyət tərəfini dərk edən gənc dənizçi, 2012-2013-cü illərdə magistr təhsili alarkən okeanlara çıxmaq hədəfini qoyur. 24 yaşı tamam olan gün — 23 dekabr 2013-cü ildə o, Türkiyəyə yollanaraq təcrübəçi matros kimi ilk beynəlxalq işinə başlayır.
Dünya limanlarında tək bir azərbaycanlı və doğma qarşılaşma
İllər keçdikcə peşəkar fəaliyyəti onu Qara dəniz, Aralıq dənizi, Baltik dənizi, Afrika sahilləri, Karib hövzəsi və Uzaq Şərq limanlarına aparır. Xarici sularda çalışarkən müasir, iritonnajlı gəmilərdə azərbaycanlı dənizçilərə çox az rast gəlməsi onda yeni bir məqsəd formalaşdırır: soydaşlarımızın beynəlxalq sularda daha çox təmsil olunması üçün praktiki vəsaitlər hazırlamaq.
Dəniz həyatı təkcə növbələr və fırtınalarla deyil, həm də unudulmaz xatirələrlə yadda qalır. Kapitan Tunis limanında başından keçən maraqlı bir hadisəni bölüşür:
Kondisioner qəzası: Qızmar yay günündə gəminin kondisioner sistemi sıradan çıxır. Heyətdə tək azərbaycanlı olan Ülfət Əzizov limanda gəzərkən yaxınlıqdakı başqa bir gəmidən doğma Azərbaycan dilini eşidir.
Həmyerli köməyi: Məlum olur ki, həmin gəminin heyəti azərbaycanlılardır. Söhbət əsnasında kondisioner problemindən xəbər tutan həmyerli elektrik mütəxəssisi dərhal gəmiyə gələrək nasazlığı aradan qaldırır. Ülfət müəllim zarafatla deyir: “Sonra heyət üzvlərinə deyirdim ki, sizin kondisioneriniz azərbaycanlıların sayəsində işləyir”.
30 yaşında kapitanlıq və müəllimlik fəaliyyəti
Cəmi 30 yaşında uzaq səfərlər kapitanı rütbəsinə yüksələn Ülfət Əzizov qazandığı təcrübələri gənc nəslə ötürmək qərarına gəlir. Öncə dərslərini adi kağızlarda çap edərək gənclərlə qeyri-rəsmi görüşlər keçirən kapitan, zamanla bu fəaliyyəti böyüdür.
2023-cü ilin dekabrında dənizçi dostları ilə birgə “Dənizçilər” Tədris Mərkəzini yaradır. 2024-cü ildə isə mərkəz rəsmi dövlət qeydiyyatından keçərək Azərbaycan Dənizçilərinin Tədris və Heyət İdarəetmə Mərkəzi (ADTHİ MMC) kimi fəaliyyətini genişləndirir.
Mərkəzin əsas hədəfi: Azərbaycanlı dənizçiləri dünya standartlarına uyğun hazırlayaraq, beynəlxalq şirkətlərin müasir gəmilərində işlə təmin olunmalarına və okeanlarda ölkəmizi təmsil etmələrinə dəstək göstərmək.
Hazırda Ülfət Əzizov həm dünya okeanlarında böyük gəmiləri idarə edir, həm də beş dənizçilik kitabının müəllifi və yüzlərlə gəncin müəllimi kimi fəaliyyətini davam etdirir. Onun yetirmələri bu gün dünyanın müxtəlif dənizlərində üzsələr də, qarşılaşdıqları hər hansı texnoloji və ya naviqasiya çətinliyində ilk olaraq yenə öz kapitanlarına — Ülfət müəllimə müraciət edirlər.
