Hər il sentyabrın 17-də Ümumdünya Pasiyent Təhlükəsizliyi Günü qeyd olunur.
Denizxeber.az bildirir ki, Ümumdünya Səhiyyə Təşkilatının (ÜST) təşəbbüsü ilə təsis edilən bu günün əsas məqsədi pasiyent təhlükəsizliyinin əhəmiyyəti barədə ictimaiyyətin məlumatlılığını artırmaq, tibbi xidmətlərin göstərilməsi zamanı yarana biləcək risklərin qarşısının alınmasına diqqət çəkmək və səhiyyə xidmətlərinin keyfiyyətinin yüksəldilməsini təşviq etməkdir.
Bu gün çərçivəsində səhiyyə müəssisələrində pasiyentlərin hüquq və təhlükəsizliyinin qorunması, tibbi səhvlərin və arzuolunmaz halların qarşısının alınması, tibb işçilərinin maarifləndirilməsi və təhlükəsiz tibbi xidmətlərin təşviqi istiqamətində müxtəlif tədbirlər keçirilir.
Pasiyent təhlükəsizliyi müasir səhiyyə sisteminin əsas istiqamətlərindən biri hesab olunur. Dəqiq diaqnostika, düzgün müalicə, dərman vasitələrinin təhlükəsiz tətbiqi, infeksiyaların profilaktikası və tibbi prosedurlar zamanı risklərin minimuma endirilməsi pasiyentlərin sağlamlığının qorunmasında mühüm əhəmiyyət daşıyır.
Ümumdünya Pasiyent Təhlükəsizliyi Günü, həmçinin səhiyyə işçiləri, pasiyentlər və onların yaxınları arasında əməkdaşlığın gücləndirilməsinin vacibliyini diqqətə çatdırır. Pasiyentin tibbi qərarların qəbulunda məlumatlı şəkildə iştirakı və həkimlə açıq ünsiyyəti təhlükəsiz və keyfiyyətli tibbi xidmətin mühüm şərtlərindən biridir.
