Oktyabrın 5-də açıqlanan gəmiçilik məlumatlarına görə, Hörmüz boğazından keçən gəmilərə edilən hücumlara baxmayaraq, sentyabrın son həftəsində Yaxın Şərqdən xam neft ixracı yeddi günün dördündə müharibədən əvvəlki səviyyəni üstələyib.
Denizxeber.az “Reuters” agentliyinə istinadən xəbər verir ki, gəmilərin hərəkətini izləyən “Kpler” şirkətinin ilkin məlumatlarına əsasən, regiondan xam neft ixracı sentyabrın 24-də, eləcə də sentyabrın 27-dən 29-dək müharibədən əvvəlki göstəriciləri keçib. Həmin günlərdə ixracın həcmi gündəlik 19,5 milyon–22,5 milyon barel arasında dəyişib.
İranla müharibədən əvvəl, yəni cari ilin fevral ayına qədər Yaxın Şərqdən xam neft ixracının orta həcmi gündəlik 18 milyon barel təşkil edib.
Məlumatlara görə, oktyabrın 1-də xam neft ixracının yeddi günlük hərəkətli ortalaması gündəlik 18,5 milyon barel olub. Bu göstəriciyə Hörmüz boğazı və Qırmızı dəniz vasitəsilə tranzit, terminallardan həyata keçirilən ixrac, eləcə də Oman körfəzində gəmidən-gəmiyə yükaşırma əməliyyatları daxildir.
“Kpler”in məlumatına əsasən, sentyabrın 30-dək olan yeddi gün ərzində xam neft, neft məhsulları, kimyəvi maddələr və qaz olmayan maye məhsulların ümumi həcmi orta hesabla gündəlik 22,4 milyon barel təşkil edib.
Sentyabr ayında Hörmüz boğazından keçən mayeləşdirilmiş təbii qaz (LNG) yüklərinin sayı da artaraq fevral ayından bəri ən yüksək aylıq səviyyəyə çatıb.
Qeyd olunur ki, məlumatlara aşkarlanmamaq məqsədilə Avtomatik İdentifikasiya Sisteminin (AIS) transponderlərini söndürərək boğazdan keçmiş ola biləcək gəmilər daxil edilməyib.
İranla müharibənin başladığı 28 fevraldan əvvəl Hörmüz boğazından gündəlik orta hesabla təxminən 125 iri kommersiya gəmisi – o cümlədən tankerlər, qaz daşıyıcıları, quru yük və konteyner gəmiləri keçirdi. Bu, dünya üzrə gündəlik xam neft və LNG tədarükünün təxminən 20 faizinə bərabər idi.
