İkinci Qarabağ müharibəsi dövründə Gəncə şəhərinin Ermənistan silahlı qüvvələri tərəfindən beşinci dəfə raket hücumuna məruz qalmasından altı il ötür.
Denizxeber.az xatırladır ki, 2020-ci il oktyabrın 17-də gecə saat 1 radələrində düşmən cəbhə zonasından kənarda yerləşən Gəncənin mərkəzindəki Cavadxan qəsəbəsini “SCUD/Elbrus” əməliyyat-taktiki ballistik raketləri ilə atəşə tutub.
Bu xain terror aktı nəticəsində 15 mülki şəxs şəhid olub, 55-dən çox insan yaralanıb, mülki infrastruktur və yaşayış evlərinə ağır ziyan dəyib. Ümumilikdə müharibə dövründə Gəncəyə edilən 5 raket hücumu nəticəsində 26 nəfər həyatını itirib, 175 sakin isə xəsarət alıb.
