Bakı–Türkmənbaşı marşrutu üzrə fəaliyyət göstərəcək yeni quru yük gəmisinin iki liman arasında konteyner daşımalarının həcmini artıracağı gözlənilir.
Bakı Beynəlxalq Dəniz Ticarət Limanının rəhbəri Eldar Salaxov bildirib ki, illik təxminən 26 min TEU təşkil edən daşımaların yeni gəmi hesabına 25–30 faiz artması mümkündür.
Onun sözlərinə görə, 6100 ton yükgötürmə qabiliyyətinə və 240 TEU tutumuna malik “Gadamly” gəmisi Türkmənistanda yerləşən “Balkan” gəmiqayırma zavodunda inşa edilən ilk quru yük gəmisidir və Xəzər dənizində, xüsusilə Türkmənbaşı–Bakı marşrutu üzrə fəaliyyət göstərəcək.
Salaxov əlavə edib ki, Türkmənistan cari ilin sonunadək daha bir analoji gəmini istismara verməyi planlaşdırır. Bu isə Azərbaycan və Türkmənistan arasında konteyner daşımalarının həcmini daha da artıra bilər.
Hazırda Orta Dəhliz üzrə yüklərin bir hissəsinin keçdiyi Bakı Limanının illik konteyner emalı gücü 150 min TEU təşkil edir. Liman rəhbərliyi infrastrukturun genişləndirilməsi, yeni avadanlıqların alınması və dibdərinləşdirmə işləri nəticəsində bu göstəricini cari ilin sonu və ya gələn ilin əvvəlində 260 min TEU-yə çatdırmağı planlaşdırır.
Nəqliyyat üzrə ekspert Rauf Ağamirzəyev isə bildirib ki, Türkmənistan istiqamətinin əhəmiyyəti Qazaxıstanın Aktau və Kurık limanları ilə əlaqələrin güclənməsi fonunda daha da artır.
Ekspertin fikrincə, Xəzərin şərq sahilində dəmir yolu və avtomobil infrastrukturunun inkişafı Orta Dəhliz üzrə yük axınlarının şaxələndirilməsinə və Azərbaycan üzərindən daha dayanıqlı daşımaların təmin olunmasına imkan verəcək.
Bakı Limanı üçün əsas konteyner yük mənbəyi hazırda Qazaxıstandır. İllik 81 mindən çox TEU yükün böyük hissəsi Çindən Avropaya tranzit daşımaların payına düşür.
2025-ci ildə Bakı Limanı vasitəsilə konteyner daşımalarının həcmi əvvəlki illə müqayisədə 39,7 faiz artaraq 107 216 TEU təşkil edib. Cari ildə isə bu göstəricinin 120 min TEU-yə çatacağı gözlənilir.
Müəllif: Nailə Bağırova. Redaktor: Dmitri Antonov
