Son 2,5 il ərzində Xəzər dənizinə 35 milyard kubmetrdən çox şirin su axını daxil olub. Bu həcm əsasən güclü daşqınlar nəticəsində formalaşıb — təkcə təbii daşqınlar hesabına 17 milyard kubmetrdən artıq su dənizə çatıb. Qalan hissə isə çay axınlarının artması və su resurslarının daha ciddi idarə olunması ilə əlaqələndirilir.
Denizxeber.az bildirir ki, Qazaxıstan tərəfinin açıqlamalarına görə, bu tendensiya Xəzərin dayazlaşma prosesini müəyyən qədər ləngidib. Hətta qeyd olunur ki, əlavə su axınları olmasaydı, 2030-cu illərdə dəniz səviyyəsi daha kritik həddə enə bilərdi.
Eyni zamanda suyun qorunması üçün kənd təsərrüfatında texnoloji dəyişikliklər aparılır. Damcı və yağmurlama suvarma sistemlərinin geniş tətbiqi nəticəsində milyonlarla kubmetr suya qənaət edilib və bu resursun bir hissəsinin Xəzərə yönləndirildiyi bildirilir.
Sənaye sektorunda da dəyişikliklər planlaşdırılır. Yeni Su Məcəlləsi çərçivəsində iri müəssisələrə suyun daha səmərəli istifadəsi, təkrar dövriyyə sistemlərinə keçid və modernizasiya proqramları tətbiq etmək öhdəliyi qoyulur.
Ümumi nəticə ondan ibarətdir ki, Xəzərin su balansı artıq təkcə təbii iqlim proseslərindən yox, həm də dövlətlərin su siyasəti və idarəetmə qərarlarından ciddi şəkildə asılıdır.
