Danimarkada aparılan yeni bir tədqiqat uzaqdan loçmanlıq (remote pilotage) sisteminin dənizdə təhlükəsizliyi, səmərəliliyi və loçmanların iş şəraitini yaxşılaşdıra biləcəyini, eyni zamanda gəmi heyəti ilə sahə operatorları arasında əməkdaşlıqda yeni çətinliklər yarada biləcəyini ortaya qoyub.
Denizxeber.az bildirir ki, “ShippingLab”, “DanPilot” və Cənubi Danimarka Universitetinin tədqiqatçıları tərəfindən hazırlanmış hesabat həm gəmilərdə, həm də sahədəki idarəetmə mərkəzlərində aparılan müşahidələrə əsaslanır.
Nəticələrə görə, uzaqdan loçmanlıq ənənəvi loçman xidmətini tam əvəz etməkdən çox, onu tamamlayan bir sistem kimi çıxış edə bilər.
Danimarka bu sahədə qabaqcıl ölkələrdən biri hesab olunur. Ötən il “DanPilot” və “Danelec” real vaxt naviqasiya məlumatlarına əsaslanan dünyanın ilk uzaqdan loçmanlıq sınaqlarını həyata keçirib.
Araşdırma həmçinin göstərir ki, loçmanın fiziki olaraq gəmidə olmaması təhlükəli transfer proseslərini aradan qaldırır, lakin gəmi heyəti ilə sahə loçmanları arasında ünsiyyət və etimad daha vacib rol oynayır.
Mütəxəssislər hesab edirlər ki, gələcəkdə ən real model ənənəvi və rəqəmsal loçmanlığın birlikdə işlədiyi hibrid sistem olacaq.
