Norveç hökumətinin yeni büdcə layihəsində dünyanın ilk gəmi tunelinin tikintisi üçün ilkin maliyyə vəsaiti ayrılıb. Bu addım layihənin 2025-ci ildə yüksək xərclər səbəbindən dayandırılmasından təxminən səkkiz ay sonra onun yenidən gündəmə qayıtmasına imkan verib.
Denizxeber.az bildirir ki, layihə çərçivəsində Norveçin Stad yarımadasında təxminən 1,7 kilometrlik gəmi tuneli inşa ediləcək. 50 metr hündürlüyündə və 36 metr enində nəzərdə tutulan tunel sahilboyu yük və sərnişin gəmilərinin keçidi üçün uyğun olacaq. Tunel gəmilərə ölkənin ən təhlükəli və sərt hava şəraitinə malik sahil hissələrindən yan keçməyə imkan verəcək.
Ümumi dəyəri təxminən 900 milyon dollar qiymətləndirilən layihə üçün büdcədə ilkin mərhələdə 15,8 milyon dollar ayrılıb. Bu vəsait əsas podrat müqavilələrinin hazırlanmasına, eləcə də tikinti sahəsində söküntü və infrastruktur işlərinin başlanmasına sərf olunacaq.
Norveç Sahil Administrasiyası bildirib ki, maliyyələşmə təsdiqlənərsə, əsas müqavilələr imzalanacaq və tikintiyə 2027-ci ildə başlanması planlaşdırılır. Layihənin beş il ərzində tamamlanacağı gözlənilir.
