Hər il sentyabrın 22-si dünyada fillərin qorunmasına diqqət çəkmək məqsədilə Ümumdünya Filləri Müdafiə Günü kimi qeyd olunur.
Denizxeber.az bildirir ki, bu əlamətdar gün dünyanın ən iri quru məməlilərindən olan fillərin üzləşdiyi təhlükələr barədə ictimaiyyətin məlumatlandırılmasına və onların mühafizəsinin vacibliyinə diqqət çəkir.
Bu münasibətlə keçirilən maarifləndirici tədbirlər insanların fillərin təbiətdəki əhəmiyyəti barədə məlumatlandırılmasına, vəhşi təbiətə qarşı məsuliyyətli münasibətin formalaşdırılmasına və nəsli təhlükə altında olan canlıların qorunmasına ictimai dəstəyin artırılmasına xidmət edir.
Fillər təbiətdə ekoloji tarazlığın qorunmasında mühüm rol oynayırlar. Onlar yaşadıqları ərazilərdə bitki toxumlarının yayılmasına, meşə və savanna ekosistemlərinin formalaşmasına, eləcə də biomüxtəlifliyin qorunmasına töhfə verirlər. Bu səbəbdən fillərin sayının azalması təkcə həmin heyvanların deyil, bütövlükdə ekosistemlərin gələcəyi üçün də ciddi təhlükə yaradır.
Hazırda fillərin qarşılaşdığı əsas problemlər sırasında qanunsuz ovçuluq, fil sümüyü ticarəti, yaşayış mühitlərinin daralması və insan-fil münaqişələri xüsusi yer tutur. Təbii ərazilərin kənd təsərrüfatı və digər fəaliyyətlər üçün mənimsənilməsi nəticəsində fillərin yaşayış arealları parçalanır, onların qida və su mənbələrinə çıxışı çətinləşir.
Mütəxəssislər fillərin qorunması üçün qanunsuz ovçuluğa qarşı mübarizənin gücləndirilməsini, təbii yaşayış ərazilərinin mühafizəsini və yerli icmaların dəstəklənməsini vacib hesab edirlər.
